Берлин: Суд дозволи истакнување на карикатури со Мухамед


Екстремно десничарската партија Про-Дојчланд вчера доби процес во Управниот суд во Берлин, со што и’ се дозволува јавно да истакнува провокативни карикатури на пророкот Мухамед.

Судот пресуди дека групата може јавно да носи копии од карикатурите на пророкот Мухамед, кои првпат се објавени во Данска во 2005. година, кога предизвикаа силни протести на муслиманите ширум светот. Исламскиот закон забранува сликање на пророкот Мухамед. Судот во Берлин ја отфрли жалбата на три исламски заедници и нагласи дека карикатурите се заштитени како „уметничка слобода“ и оти законски не можат да бидат сметани за злоупотреба од страна на некоја верска група.




Судот смета дека прикажувањето на карикатурите не претставува повик за омраза или насилство
„Едноставното прикажување на карикатурите со Мухамед не претставува повик за омраза или насилство против специфичен дел од популацијата“, наведе судот.

Про-Дојчланд ќе ги носи утре карикатурите на Мухамед пред три џамии во Нојколн и Вединг. Две од нив важат за центри на радикално-исламистичките салафисти. Протестите доаѓаат на крајот на рамазанските пости и ќе се случат под мотото „Исламот не и’ припаѓа на Германија – запирање на исламизацијата“.

Полицијата стравува од судири за време на демонстрациите во Берлин, откако на слични протести во Северна Рајна Вестфалија се случи насилство меѓу демонстрантите и заштитниците на јавниот ред.

извор: dw.de